قبل المونديال قالوا أن المنتخبَ المغربي وَقَعَ في مجموعة الموت ..وأن منتخبات كرواتيا وبلجيكا واسبانيا غادي يضربونا بالصواريخ العابرة للقارات ، و أمام كندا نديرو مجهود باش نخرجو من قطر بنقطة واحدة .. و غادي تكون مشاركة مُشرفة بحال للي وقع في روسيا 2018 ..
دابا كاين ضجيج في مواقع التواصل الاجتماعي.. علاش مباراة ودية مع البرازيل بالضبط ؟
يقولون من الأفضل نبتعدو عن شي هزيمة نكراء والشوهة قدام البادي والعادي .. لو أن الجامعة برمجات ماتش ودي مع بولونيا أو البراغواي كون قالو لقجع تيضحك علينا .. احنا راه أصحاب المركز الرابع في المونديال ..!!
أكيد أن سقف الانتظارات طلع بزاف عند الجماهير المغربية واخا الخصم من العيار الثقيل .. دون أن ننسى أن منتخبات ” السيليساو ” و المان شافت وغيرها رغم كونها قوة كروية ضاربة خرجو من كأس العالم دون مجد و بمعنويات في الحضيض ..
و زايدون الكرة ما لهاش كِبير كما يقول أشقاءنا المصريين ..
لذلك خصنا نساندو بملعب طنجة منتخبنا الوطني و الركراكي في هاد اللقاء الودي لي ماشي رسمي.. ولكن غادي يكون تجربة تاريخية بكل المقاييس في مشوار المنتخب.. ويكون خير ..
لمن يفهمُ الحَكمة والمعاني أقول :
” خليك راكْ غادي ..و كَمَّلْ عادي “..سير ..
محمد بوزفور
تعليقات الزوار ( 0 )